अछाममा युवकको हत्याको आरोपमा ६ जना पक्राउ

धनगढी- अछाममा युवकको हत्याको आरोपमा ६ जनालाई प्रहरीले पक्राउ गरेको छ । भदौ १६ गते २४ वर्षीय युवकको कुटपीटपछि मृत्यु भएको घटनामा संलग्न  आरोपमा प्रहरीले ६ जनालाई पक्राउ गरेको हो ।

जिल्ला प्रहरी कार्यालय अछामका प्रहरी निरीक्षक रमेश दत्त अवस्थीका अनुसार पक्राउ पर्नेमा कमलबजार नगरपालिका ६ हात्तीबाजका १९ वर्षका खेमराज शाही, २० वर्षका भूपेन्द्र शाही, २० वर्षका विनोद बहादुर शाही, २१ वर्षका अक्कल शाही, १९ वर्षका विनोद शाही र २५ वर्षका रमेश शाही रहेका छन् ।

प्रहरीका अनुसार, भदौ १६ गते मंगलसेन नगरपालिका वडा नम्बर १४ कालागाउँका २४ वर्षका सन्तोष भण्डारीलाई सोही वडा खानडाडा भन्ने स्थानमा भुपेन्द्र शाही लगायत ७/८ जनाको समूहले कुटपिट गरेका थिए ।

घाइते भण्डारीको अछाम जिल्ला अस्पताल मंगलसेनमा उपचार हुन नसकेपछि थप उपचारका लागि नेपालगन्ज लैजाने क्रममा मृत्यु भएको जनाइएको छ ।