चैत ८ गतेदेखि ‘डडेल्धुरा महोत्सव २०७८’ हुने

डडेल्धुरा : डडेल्धुरामा ‘डडेल्धुरा महोत्सव २०७८’ हुने भएको छ।

अमरगढी नगरपालिकाको आयोजनामा चैत ८ गतेदेखि १० गतेसम्म टुँडिखेलमा ‘डडेल्धुरा महोत्सव २०७८’ हुने भएको हो।

सोमबार पत्रकार सम्मेलनको आयोजना गर्दै नगरपालिकाले महोत्सव बारे जानकारी दिएको हो।

रजत जयन्तिको अवसर पारेर प्रतिभा पहिचान तथा संस्कृति संरक्षणका लागि महोत्सवको आयोजना गर्न लागेको नगर प्रमुख विशेश्वरप्रसाद ओझाले बताए।

महोत्सवले स्थानीय कला ससंकृतिको संरक्षण गर्ने नगरप्रमुख ओझाले जिकिर गरे। महोत्सवमा सुदूरपश्चिमको कला संस्कृतिको संरक्षणमा जोड दिइनेछ।

प्रतिभा पहिचान तथा संस्कृति संरक्षणका लागि महोत्सवको आयोजना गरिन लागिएकोले कर्णाली पारीका कुनै पनि कलाकारलाई महोत्सवमा स्थान नदिइने ओझाको भनाइ छ।

महोत्सवमा सुदूरपश्चिमका राष्ट्रिय तथा स्थानीय कलाकारको प्रस्तुतिसँगै हुडकेली, छलिया, डेउडालगाएतका स्थानीय प्रस्तुति हेर्न सकिनेछ। महोत्सव निःशुल्क हेर्न पाइनेछ।