कविता : विचार के हो ?
बोलन्या थली |
२९ जेष्ठ २०७७, बिहीबार 
- बिलय सागर
बिचार के हो ? वाद के हो ?
मलाई केही थाह छैन।
तर भोकाले खान पाउनु पर्छ
नाँङ्गाले लाउन पाउनु पर्छ
रोगले सुकेका जीउहरुले
औषधीमुलो पाउनु पर्छ ।
सिद्धान्त के हो ? व्यवस्था के हो ?
मलाई केही थाह छैन।
गरिखान काम पाउनु पर्छ
कामको माम पाउनु पर्छ
आफ्नो अधिकारको रक्षाका लागि
निर्धक्क बोल्न पाउनु पर्छ ।
सत्ता के हो ? सरकार के हो ?
मलाई केही थाह छैन।
गरिबले पढ्न पाउनु पर्छ
अगाडी बढ्न पाउनु पर्छ
दुरदराजका झुपडीहरुले
मोटर चढ्न पाउनु पर्छ ।
पुँजीवाद के हो ? साम्यबाद के हो ?
मलाई केही थाह छैन ।
झुपडीमा उज्ज्यालो आउनु पर्छ
ओठमा हाँसो छाउनु पर्छ
रोएर जिन्दगी काट्नेहरुले
हाँसेर बाँच्न पाउनु पर्छ ।
